In dou-mil-vint’è-dou, l’è kan mimo bi dè povê adi vouèrdâ ouna pitita kotse din la Grevire po èkrire in patê. L’è pâ po l’è gabâ, ma l’è vré ke no j’an de la tsanthe ke nouthra gajèta chotin nouthra linvoua è on pou tyè lè rèmarhyâ.

Pâ fachilo dè rèprindre chin apri Titi Yêrle, li ke l’è ouna chutya patêjanna k’on konyè du bin yin. Moujâdè-vê, kan Anne Marie vo di ke vou léchi cha pyathe a on dzounelè ko mè po èkrire din la gajèta: chin vo fâ on bokon a pouêre po keminhyi. È pu, apri avi bin dèvejâ avu li, mè chu de k’on pou pâ rèfoujâ dè bayi dè chon tin po la tsèvanthe dou patê. I rèmârhyo Titi po le bi l’ègjinpyo ke mè léchè.

L’é de la tsanthe ke Vonvon, Bèrnâ è Gérard a Tônon van kontinuâ d’èkrire dè tin j’in tin. Dinche che ‘na chenanna l’é pâ tru d’idé, vo j’ari le drê a lou bi j’artikle!

D’ayeu, che vo j’i on kou l’invide dè betâ on piti ôtyè dè galé in patê, fédè-mè chunyo, l’è avu gran pyéji k’on pou vouityi chin inthinbyo!

Chin ke l’è chur, l’è ke l’afére va pâ tsêre in èkouéche! I ché pâ che l’é chinyi po atan grantin tyè Titi, ma che mè vouêrdon ache grantin po la rubrike «Deché-delé», chin fâ ke li arè dou patê din la Grevire tantyè in dou-mil-vouètant’è-chê!

Alin dza tanty’a dechando ke vin tyé!

Bouna fin dè chenanna a totè è a ti.

Romain Pittet

Le coin du patois continuera! (restera)

En 2022, c’est quand même beau de pouvoir encore garder un petit endroit dans La Gruyère pour écrire en patois. Ce n’est pas pour les venter, mais c’est vrai que nous avons de la chance que notre «gazette» soutient notre langue et on ne peut que les remercier.

Pas facile de reprendre cela après Titi Yerly, elle qui est une excellente patoisante qu’on connait depuis bien loin. Pensez-voir, quand Anne-Marie vous dit qu’elle veut laisser sa place à un tout jeune comme moi pour écrire dans le journal: cela vous fait un peu peur pour commencer. Et puis, après avoir bien discuté avec elle, je me suis dit qu’on ne peut pas refuser de donner de son temps pour la promotion du patois. Je remercie Titi pour le bel exemple qu’elle me laisse.

J’ai de la chance que Vonvon, Bernard et Gérard à Tônon vont continuer d’écrire de temps en temps. Comme ça, si une semaine je n’ai pas trop d’idée, vous aurez le droit à leurs beaux articles!

D’ailleurs, si vous avez une fois l’envie de mettre un petit quelque chose de joli en patois, faites-moi signe, c’est avec plaisir qu’on peut regarder cela ensemble!

Ce qui est sûr, c’est que l’affaire ne va pas tomber à l’eau! Je ne sais pas si j’ai signé pour autant longtemps que Titi, mais s’ils me gardent aussi longtemps pour la rubrique «Deci-delà», ça fait qu’il y aura du patois dans la Gruyère jusqu’en 2086!

Allons déjà jusqu’à samedi prochain tyé!

Bonne fin de semaine à toutes et à tous.

Romain Pittet