Ma na! L’i a rin-mé dè Rèkrotson, on chè rakroutsè i chovinyi dè Bènichon, inke to ! Di bin galé chovinyi. Ou dzoua d’ora, la fitha l’è pye chyâ din lè famiyè, ma, le goutâ l’è adi parê bon.

Lè Bènichon d’où viyo tin bayivan yu a di rinkontrè mèmorâbyè è a di rèpé intêrminâbyo. Vo chédè adi to chin ke lè koujenêrè beton chu la trâbya, l’i rèvinyo pâ.

Ma adon, din mon dzouno tin, po no j’ôtro lè dzouno, l’è le pon di danthè ke no j’aterivè. Achtou le goutâ avalâ, lêvi amon ou velâdzo. Lè tyintè balè koràlè, chu chi pon dè bou. La polka, la valtse a la kanbyâye… du tin j’in tin on piti tango kan mimo. L’okajyon dè chè charâ otyè pye pri. Lè viyo, atra-byâ ou kabarè, dzetâvè on yè chèvéro in kontre lè danhyà, è vê lè fiyè chuto, on ch’in fotê pâ mô!

L’inkourâ, a la gran- mècha, fajê on pridzo partikulyé : lè dzin dèvechan lou tinyi adrê è po lè j’infan: intèrdikchyon dè rôdâ i j’alintoua dou pon dè danthè, yô i chè pachâvè, ke dejê, di « tsoujè pâ onithè »!

Hou j’infan-inke, dèvechan alâ chè brinâ… chu lè pon di grandzè, inke to!

Anne Marie Yerly

Récrotson

Mais non! Il n’y a plus de Récrotson, l’on se raccroche aux souvenirs de Bénichon. Voilà tout! De bien jolis souvenirs. Aujourd’hui, la fête est plutôt dans les familles, mais, le dîner est toujours aussi bon.

Les Bénichons du vieux temps donnaient lieu à des rencontres mémorables et à des repas interminables. Vous savez encore tout ce que les cuisinières mettent sur la table, je n’y reviens pas.

Mais alors dans ma jeunesse, pour nous les jeunes, c’est le pont de danses qui nous attirait. Sitôt le dîner avalé, «loin, en haut au village». Quelles belles coraules, sur ce pont de bois, la polka, la valse sautée… et de temps en temps un petit tango quand même. L’occasion de se serrer un peu plus près. Les vieux, attablés au café, jetaient un œil sévère vers les danseurs, et vers les filles surtout. L’on s’en fichait pas mal!

Le Curé, à la grand’messe, faisait un sermon particulier: les gens devaient se tenir comme il faut et pour les enfants: interdiction de rôder aux alentours du pont de danses, où il se passait, disait-il, des «choses pas honnêtes».

Ces enfants-là devaient aller se balancer sur les ponts de granges, voilà tout!

Anne Marie Yerly