Vo j’i prou chur konyu, oumintè oyu dèvejâ, dè Pekôji di Chouvin. Ha brâva fèmala ke l’a èkri ‘na redâye dè galéjè biyôtè din la kotse dou patê tantyè in mil-nou-thin vouètant’è trè. Maria Beaud-Pugin l’è vinyêt’ou mondo ou Tsathèlâ. L’è modâ apri po bayi l’èkoula din l’Intyamon, yô l’a trovâ che n’omo è pachâ le richto dè cha ya. Ha chejinta dzin l’a fê on mache dè tsoujè po tsèvanhyi cha premire linvoua.

L’é rètrovâ kotyè fariboulè ke l’avê kontâ on yâdzo din la Grevire. N’in d’a bin kotyè j’enè ke vâyon la pêna d’ithre rèchayêtè. Adon tinke ouna dè chè gougenètè:

Lè dou piti j’infan a Guchtine dou Pyâno vinyon la trovâ on dzoua. Chtache rèvojê di grôchè tithè dè tsou dèvan la dzalâye. La mér’gran di a chè piti:

- Te vê hou balè tithè dè tsou? È bin, tè piti Djan, i t’an trovâ din ‘na grôcha titha dinche. Tè ma pitita Luchi, t’irè din ‘na lorda kudra.

La fiyèta, chi j’an, di a chon frârè dè chat’an :

- No fô li dre la vertâ?

- Ouah, l’è dza viye, vô mi la léchi krêre tantyè ou bè!

Pekôji di Chouvin irè ‘na fâchèyàja, è adi ora, no fâ a rire avu chè pititè j’ichtouâre.

Bouna fin dè chenanna!

Romain Pittet

Primevère des «Chouvin (lieu dit)

Vous avez sûrement connu ou au moins entendu parler de Pekôji di Chouvin. Cette brave femme qui a écrit une multitude de jolies publications dans le coin du patois jusqu’en 1983. Maria Beaud-Pugin est née au Châtelard. Elle est ensuite partie pour enseigner dans l’Intyamon, où elle a trouvé son mari et passé le reste de sa vie. Cette agréable personne a fait beaucoup de choses pour promouvoir sa langue maternelle.

J’ai retrouvé quelques histoires drôles qu’elle avait racontées jadis dans La Gruyère. Il y en a bien quelques-unes qui valent la peine d’être ressorties. Alors voici une de ses anecdotes:

Les 2 petits-enfants d’Augustine du «Pyâno» (platane) viennent la trouver un jour. Celle-ci réduisait des grosses têtes de choux avant la gelée. La grand-maman dit à ses petits:

- Tu vois ces belles têtes de choux? Et bien, toi petit Jean, ils t’ont trouvé dans une grosse tête comme ça. Toi ma petite Lucie, t’étais dans une grosse courge.

La petite fille, six ans, dit à son frère de sept ans:

- Il nous faut lui dire la vérité?

- Ouah, elle est déjà vieille, vaut mieux la laisser croire jusqu’au bout!

Pekôji di Chouvin était une farceuse, et encore maintenant, elle nous fait rire avec ses petites histoires.

Bonne fin de semaine!

Romain Pittet