Le mihyi dè châron

Mon chènya irè le dêri châron dè Tsarmê. Pou-t-ithre mimamin dou tchinton. Tchè ke fajê le châron? I fajê è takounâvè lè badyè po la payijanèri è achbin po lè j’inkotsârè, po lè drinâdzo, po lè minâdzo, di dèmori et bin d’ôtrè tsoujè. Mè chu moujâ ke chi viyo mihyi, èretâdzo ke ma léchi mon chènya, meretâvè k’on li bayichè ’na trache. I vu èprovâ dè le fére in patê. Bin chur ke mè chovinyo pâ dè totè lè j’èchprèchyon in patê, mimamin pâ in franché. Le dêri chovinyi ke l’é irè din lè j’an vouètanta. Chu jou avui li inkotchi di korbè din la dzà dè la Vêrnèta.

Kan iro dzouno, l’avi thin chi j’an, alâvo din che n’ateyé po li bayi di kou dè man. Idjivo kan fayi tinyi on mochi dè bou ma achbin po nètèyi l’atyé. Ramachâ lè bube, le réchon è lè tsejya dè bou. In chti tin, le…