Dechando né pachâ, la chochyètâ di j’armayi de la Grevire l’a jou che n’athinbyâye a Rya. Ti lè j’an, ha vèya chè fâ din on ôtro velâdzo è l’è lè dzin dè chi velâdzo ke fan partya de la chochyètâ ke beton la châla in pyathe.

Kemin a Rya no j’an rin mé dè granta châla avui on kabarè, l’è la chochyètâ dè dzounèche ke l’a jou le pyéji d’organijâ on bar è le charvucho po bêre kartèta è ke l’a inkotchi la choupa dè tsalè po l’è trè-than dzin prèjintè. Ouna bouna partya dè hou dzouno l’avan djamé yu oun’athinbyâye dinche è l’an dèkrouvâ ha chochyètâ.

Dè furi pachâ, a Bulo, lè j’armayi de la Grevire l’an fithâ le thantyimo anivèrchéro dè lou chochyètâ. Apri ouna bala mècha in patê è la bènèdikchyon d’ouna novala banyére, on bi kortéje l’a intrètsantâ on mache dè dzin! Di vatsè, di tsavô, di tchivrè, di fayè, di balè fanfare, di banyére, di barbu è di galé j’armayi l’an tseminâ a travê la vela. Apri chin, on gran bankè chu la pyathe dou martchi po markâ chi pachâdzo dou thantyimo. Le komité d’organijachyon l’a fê on lordo travô è la fitha l’è jou bala è ravuchête.

Dechando né pachâ, bin kotyè fiyètè è bouébo dè tsalè l’an totchi lou diplôme. Ha chochyètâ l’è adi bin in ya. Bin chur ke l’è pâ mé tyè di vretâbyo j’armayi ke fan partya de la binda. Ma l’è di dzin ke chon jou jà on yâdzo ou tsalè po trintyi, idji kemin bouébo ou vajiyê. L’è ora on bokon oun’amikal di dzin de têra ke l’an a kà dè chotinyi hou balè vayà de la montanye.

Ke grantin onko vèkechichè la chochyètâ di j’armayi de la Grevire è ke grantin on pouéchè adi medji dou bon fre dè montanye dè nouthra kotse!

Romain Pittet

L’assemblée des armaillis

Samedi soir passé, la société des armaillis de la Gruyère a eu son assemblée à Riaz. Chaque année, cette soirée se fait dans un autre village et c’est les gens de ce village qui font partie de la société qui mettent la salle en place.

Comme à Riaz nous n’avons plus de grande salle avec un bistrot, c’est la société de jeunesse qui a eu le plaisir d’organiser un bar et le service pour boire quelque chose et qui a préparé la soupe de chalet pour les 300 personnes présentes. Une bonne partie de ces jeunes n’avaient jamais vu une assemblée comme ça et ils ont découvert cette société.

Le printemps passé, à Bulle, Les armaillis de la Gruyère ont fêté le 100e anniversaire de leur société. Après une belle messe en patois et la bénédiction d’une nouvelle bannière, un beau cortège a enchanté les gens! Des vaches, des chevaux, des chèvres, des brebis, des belles fanfares, des bannières, des barbus et des jolis armaillis ont cheminé à travers la ville. Après ça, un grand banquet sur la place du marché pour marquer le passage du 100e. Le comité d’organisation a fait un grand travail et la fête a été belle et réussie.

Samedi soir passé, bien quelques filles et garçons de chalet ont touché leur dîplome. Cette société est encore bien en vie. Bien sûr que ce n’est plus que des véritables armaillis qui font partie de la bande. Mais c’est des personnes qui ont eu été une fois au chalet pour faire le fromage, aider comme «bouébo» ou garde-génisse. C’est maintenant un peu une amicale des gens de la terre qui ont à cœur de soutenir ces belles valeurs montagnardes.

Que longtemps encore vive la société des armaillis de la Gruyères et que longtemps on puisse encore manger du bon fromage d’alpage de notre région!

Romain Pittet