Vo le chédè achurâ, nouthra gajèta chè yê bin in-delé di frontêre dè nouthron tyinton. Din tota la Chuiche, ma achebin din di j’ôtrè payi. Du dza bin kotyè djijannè d’an, nouthra Grevire fâ le voyâdzo tantyè dè l’ôtra pâ de la goye, ou Kanada. On mache dè famiye dè vêr no ke chon modâ din lè j’an chaptantè, vouètantè ou nonantè por atsetâ on bin l’an vouêrdâ on intèrè po ha gajèta ke kontè on bokon chin ke chè pâchè din le dichtri è mimamin din le tyinton. Kan i chobrâvo ou Québec, mè chovinyo k’irè pâ rin dè vêre La Grevire arouvâ vê mè gran-parin. Chovin ‘na chenanna apri, di kou duvè, ma le pyéji irè inke è i pu vo dre ke ti lè kâro dou papê iran yê! L’è pê pouchta ke nouthra Grevire modâvè po le payi di Karibou. Tantyè ou keminhyèmin dè chti an, la gajèta l’avi adi le drê dè prindre…