Demindze matin pachâ, avui ma miya, no chin montâ a vèlo tanty’a Mothèlon po la mècha.
Dèvan ha galéja pitita tsapala, l’abé Yachon l’a de la mècha. On mache dè mondo chè rèdzoyi din ha bala kotse dè montanye.
L’è vré ke ti lè dzin k’iran inke, iran inke pachke l’avan invide, adon l’abyanthe irè bouna. I tràvo ke l’è bi dè vouèrdâ hou balè kothemè dè dre la mècha fro, din la natura. Lè dzin âmon bin chin. Ou dzoua d’ora, pâ fachilo dè vêre lè mohyi bondâ. Ma chin vou pâ a dre ke lè dzin krêyon min… Pouârtè pâ bin a chin ke vo krêdè, ke vo bayidè le non dè Bon-Dyu, Natura, « Energie »,… To chin lè bin méhyâ, è du tin ke vo j’apouârtè ôtyè din vouthra ya, l’è chin ke kontè ! Ha Fouârthe l’è inke po idyi hou ke volon.
To chin po dre ke no j’an pachâ on bi momin, in montanye, to pri dou ryô. È moujâdè bin ke l’apèrô a la pinta, l’è pâ krouyo è l’è pâ dè rèfoujâ ! Romain Pittet

Le Bon-Dieu jusqu’à Motélon

Dimanche passé, avec ma copine, nous sommes montés à vélo jusqu’à Motélon pour la messe.
Devant cette jolie petite chapelle, l’abbé Glasson a dit la messe. Beaucoup de monde se sont réjouis dans ce bel endroit de montagne.
C’est vrai que tous les gens qui étaient là, ils étaient là car ils en avaient envie, alors l’ambiance était bonne. Je trouve que c’est beau de garder ces belles coutumes de dire la messe dehors, dans la nature. Les gens aiment bien ça. Au jour d’aujourd’hui, il n’est pas évident de voir les églises remplies. Mais cela ne veut pas dire que les gens croient moins… Peu importe à ce que vous croyez, que vous donniez le non de Bon-Dieu, Nature, Energie,… Tout cela est bien mélangé et dès le moment que ça vous apporte quelque chose dans votre vie, c’est ce qui compte ! Cette Force est là pour aider celles et ceux qui veulent. Tout ça pour dire que nous avons passé un beau moment, en montagne, tout près du ruisseau. Et pensez bien que l’apéro à la pinte, ce n’est pas « crouille » et ce n’est pas de refus ! Romain Pittet