Tyinta bala réjon, è l’è chin ke le «Club alpin» d’la Grevire l’a volu rapalâ tot’in fithin lè than t’an dè cha fondachyon. Po chin, ouna kobya dè dzin dèvouâ l’an organijâ dariremin, chu trè dzoua, ouna chayête a Bonnavaux po di j’andikapâ è po lè j’anhyan dou club. Oun’organijachyon a n’in pâ krêre chè jyè l’è jou betâye chu pi. Du Granvelâ on chin tot’a l’àra ke di j’andze gardyin van no chiêdre to le dzoua. Arouvâ ou park di Bâdè. tsakon l’a rèchu on «T-shirt» avu chon non. On bon kafé avu d’la trèthe a Delabays i va tarubyamin bin in akutin la binvinyête dè Francis Grandjan d’Innê, ke no j’aprin kemin va chè pachâ ha montâye a Bonnavaux.
To bounamin lè dzin chè beton in route. Hou ke l’an fan dè montâ a pi, l’an onko l’èpâhyo dè grèpi din na «jeep» tantya Coudré è pu apri chon idji pâ di j’akonpanyan. Du le park di Bâdè, lè j’andikapâ è hou k’lan le chohyo kour è lè tsanbè mafite chon prê in tsêrdze pa ouna «joëlette», èchpéche dè tsarèta a ouna ràvoua idya pê ouna batèri è chuto terya pê katro dzounè dzin. Atan dè filye tyè d’omo.
Bin chur ke l’a fayu bin dou tin po vêre arouvâ to chi mondo a Bonnavaux, tsakon lè jyè pyin dè dzouyo dè rètrovâ chi bi l’indrê. Le Vani Nê la pu rinvouyi la rèthrenâye d’on kouâr di vani tinyê pê ouna galéja grahyàja in dzakiyon. Apri l’apéro, lè makaroni dou tsalè a Pierrot l’an fi partya don bon rèpé. La dèchinte chè fête avu atan d’éde è dè prèkôchyon.
Apri ouna paryè bala dzornâye, on pou tyè ch’abohyâ è chè dre k’on trâvè adi di dzin k’lan le kà a la bouna pyathe.
Vonvon Kolly
Ensemble tout est possible
Quelle belle raison, et c’est cela que le Club alpin de la Gruyère a voulu rappeler tout en fêtant les 100 ans de sa fondation. Pour cela, un important nombre de gens dévoués ont organisé dernièrement, sur 3 jours, une sortie à Bonnavaux pour des handicapés et les anciens du club. Une organisation à n’en pas croire ses yeux a été mise sur pied. Depuis Grandvillard, on sent tout de suite que des anges gardiens vont nous suivre tout le jour. Arrivé au parc des Bâdè, chacun a reçu un T-shirt avec son nom. Un bon café avec de la tresse à Delabays va terriblement bien en écoutant la bienvenue de Francis Grandjean d’Enney, qui nous apprend comment va se passer cette montée à Bonnavaux.
Tout gentiment les gens se mettent en route. Ceux qui ont envie de monter à pied ont encore la possibilité de grimper dans une jeep jusqu’à Coudré et après ils sont aidés par des accompagnants. Depuis le parc des Bâdè, les handicapés et ceux qui ont le souffle court et les jambes fatiguées sont pris en charge par une «joëlette», espèce de charrette à une roue, aidée par une batterie et surtout tirée par 4 jeunes gens. Autant de filles que d’hommes.
Bien sûr qu’il a fallu du temps pour voir arriver tout ce monde à Bonnavaux, chacun les yeux plein de joie de retrouver ce bel endroit. Le Vanil-Noir a pu renvoyer la résonnance d’un cor des alpes tenu par une gracieuse jeune fille en dzakiyon. Après l’apéro, les macaronis à Pierrot ont fait partie d’un bon repas. La descente s’est faite avec autant d’aide et de précautions. Après une pareille journée, on ne peut que s’incliner et se dire qu’on trouve encore des gens qui ont le cœur à la bonne place.
Vonvon Kolly