Tinke dza on an ke l’é rèprê la rubrika «Deché-delé». Le tin i vôlè!

Kan iro piti, mè rapalo k’irè tarubyamin gran, on an. Ma du ke chu chayi de l’èkoula; dè l’èkoula chèkondére bin chur pachke a l’ékoula li chu adi… è bin i chinbyè ke lè j’an pâchon pye rido! Ma l’é de la tsanthe pachke l’é tyè vint’è trè j’an. Ma a tot’âdzo l’è bin dè chè rindre konto ke l’è le momin préjin ke fô pâ oubyâ d’aprèchyâ!

Adon po le momin, l’é adi kotyè j’idé por èkrire mè biyôtè ma i ché pâ tanty’a kan! L’é bin chur pâ le mereto d’avi konpojâ thinkantè dou j’artikle. Po chin, l’é la tsanthe dè povê kontâ chu le chotin dè Vonvon Kolly, Bèrnâ Chaney, Gérard Rime è Bèrnâ Repond ke m’invouyon achebin lou j’èkri dè tin j’in tin. Chin mè fâ pyéji dè lè betâ è i mè fâ ouna pitita pouja achebin. L’avé de a Titi Yêrle ke cholè, irè on bokon tru. Adon i rèmârhyo totè hou dzin ke mè chotinyon è ke l’an a kà d’èkrire in patê.

I vu achebin rèmarhyâ hou ke prinnyon la pêna dè yêre le patê ou dè l’akutâ chu le «site» dè la gajèta. Chin mè fâ tsô ou kà dè vêre è d’oure ke prà dè mondo dèginyon pâ le patê ma ke li tinyon è l’âmon.

A vo totè è ti: on grô Marthi!

Romain Pittet

Déjà une année!

Voilà déjà une année que j’ai repris la rubrique «Deché-delé». Le temps passe!

Quand j’étais petit, je me rappelle que c’était terriblement long, une année. Mais depuis que je suis sorti de l’école; de l’école secondaire bien sûr car à l’école j’y suis encore… et bien il semble que les années passent plus vite! Mais j’ai de la chance car j’ai que 23 ans. Mais à tout âge c’est bien de se rendre compte que c’est le moment présent qu’il ne faut pas oublier d’apprécier!

Alors pour le moment, j’ai encore quelques idées pour écrire mes articles mais je ne sais pas jusqu’à quand! Je n’ai bien sûr pas le mérite d’avoir composé 52 articles. Pour cela, j’ai la chance de pouvoir compter sur le soutien de Vonvon Kolly, Bernard Chaney, Gérard Rime et Bernard Repond qui m’envoient aussi leurs écrits de temps en temps. Ça me fait plaisir de les mettre et ça me fait aussi une petite pause. J’avais dit à Titi Yerly que seul, c’était un peu trop. Alors je remercie toutes ces personnes qui me soutiennent et qui ont à cœur d’écrire en patois.

Je veux aussi remercier celles et ceux qui prennent la peine de lire le patois ou de l’écouter sur le site de la gazette. Ça me fait chaud au cœur de voir et d’entendre que beaucoup de monde ne tourne pas le dos au patois mais qui y tiennent et qui l’aiment.

A vous toute et tous: un grand Merci!

Romain Pittet