Le tin di Fithè l’è pâ totafé kemin lè j’ôtro, on prin mé dè tin po chè vêre, mé dè tin po moujâ i j’ôtro, mé dè tin po medji, … Bin chur ke l’è pâ tyè intrè Tsalandè è le Boun’An k’on po chè vêre è partadji di bounè vouêrbè dè dzouyo, ma chi tin l’è inke po no rapalâ ke l’è inportin dè prindre le tin.
Vouéro dè kou on chè di: mè fô alâ li dre bondzoua, mè fô alâ la trovâ, mè fô fére chin on kou, … Prou chovin chè l’è pâ tru tâ, l’è outoua dè la fin dè l’an k’on moujè a chin.
Po l’an 2024, portyè pâ chè dre ke no puyin prindre dou tin po lè dzin k’on âmè mé chovin è pâ atindre 2025?
Pâ fôta dè grô kadô po chè fére a pyéji. Ou dzoua d’ora, bayi dè chon tin i j’ôtro, prindre on momin po kôkon; krêyo ke l’è chin le pye bi di préjin!
La ya chè pâchè inke è ora. No chin pojâ chu Têra po kotyè djijannè d’an dèvan dè rèmodâ. L’è po ti parê. Adon, chuto pâ rèbetâ a dèman lè bi momin a partadji avui le kà.
Bondzoua dè Boun’An a totè è a ti!
Romain Pittet
L’An Nouveau
Le temps des Fêtes n’est pas tout à fait comme les autres, on prend plus de temps pour se voir, pour penser aux autres, pour manger, … Bien sûr que ce n’est pas qu’entre Noël et Nouvel An qu’on peut se voir et partager de bons moments de joie, mais ce temps est là pour nous rappeler que c’est important de prendre le temps.
Combien de fois on se dit: il me faut aller lui dire bonjour, il me faut aller la trouver, il me faut faire ça une fois, … La plupart du temps, si ce n’est pas trop tard, c’est autour de la fin de l’année que l’on pense à cela.
Pour l’année 2024, pourquoi pas se dire que nous pouvons prendre du temps pour les gens qu’on aime plus souvent et ne pas attendre 2025?
Pas besoin de gros cadeaux pour se faire plaisir. Au jour d’aujourd’hui, donner de son temps aux autres, prendre un moment pour quelqu’un; je crois que c’est cela le plus beau de présent!
La vie se passe ici et maintenant. Nous sommes posés sur Terre pour quelques dizaines d’années avant de repartir. C’est pour tout le monde pareil. Alors, surtout ne pas remettre à demain les beaux moments à partager avec le cœur.
Bonne heureuse Année à toutes et tous!
Romain Pittet