Kan l’a keminhyi chè premire levrèjon dè kochtume d’armayi, le bredzon è lè tsothè dè tridzo, Bertha dèmandâvè chate fran po la fathon è le koton di brodèri. La matêre kothâvè intrè chate è vouè fran le mêtre. Tot’èthê fê chu méjerè è li fayê inveron trè dzoua dè travô por on kochtume. La martchandi vinyê dè Bienne ou dè Langenthal in pithè dè than-tchindzè chantimêtre dè lardzo. Bertha kontâvè trè mêtre po na vithire dè taye moyêna. Le pye pènâbyo èthê dè kopâ la matêre è d’la kàdre.

La brodèri di bal’èthêlè è di liserè èthan fê ou poin d’èpena è lè botenêre chè fajan achebin totè a la man. La broderi chè fajê dè prèferinthe a la vèya, le fi byan chu le kouti bleu choladjivè mé lè j’yè. Lè kemandè vinyan in priyoritâ d’la Grevire yô le kochtume d’armayi èthê le dêri dè Chuiche a ithre naturèlamin portâ, dzoua è demindze pê lè payijan.

Ti lè j’an èthê a pou pri intrè chouchante è chaptante kochtume ke chayivan di man dè Madama Bertha. Lè dèmandè dè kochtume por’infan ne mankâvan pâ, chuto po di nothè, batchimo è anivèrchéro.

Che, on li dèmandâvè tantyè a kan moujâvè fére di bredzon, in rijolin i rèpondê: "è bin chédè-vo, tan ke pori, è pu kan t’on âmè travayi, adon mé n’in féjo, mé l’é onkora l’invide din fére”. Bertha èthê na figura tipika dou Val dè Tsêrmê. Le ondzè dou mi dè juyè mile-nou-than -vouètant’è- chate, ou mohyi dè Tsêrmê  chenâvê l’agoni, la granta chètse èthê intrâye din cha méjon, Bertha l’avê vouètant’yon’an.

Infan, l’è le chovinyi d’avê pachâ dèvan Bertha po prindre di méjerè, mè parin m’avan payi on kochtume d’armayi po la demindze, bredzon avu lè tsôthè kourtè.

Gérard Rime a Tônon Tsêrmê                                                                                                            

Charmey, haut lieu du bredzon (2)

Quand elle a commencé ses livraisons de costumes, le bredzon et le pantalon de triège, elle demandait sept francs pour la façon et le coton de broderie. La matière coutait entre sept et huit franc le mètre. Tout était fait sur mesure et il fallait environ 3 jours de travail pour 1 costume. La marchandise venait de Bienne ou de Langenthal en pièce de 115 centimètres de large. Bertha contait 3 mètres pour un habit de taille moyenne. Le plus pénible était de couper la matière et de la coudre.

Les broderies des edelweiss et des liserés étaient faites au point d’épine et les boutonnières se faisaient aussi toutes à la main. La broderie se faisait de préférence en soirée, le fil blanc sur le coutil bleu soulageait plus les yeux. Les commandes venaient en priorité de la Gruyère où le costume d’armailli était le dernier de Suisse à être naturellement porté jours et dimanches par les paysans.

Tous les ans, c’était à peu près entre 60-70 costumes qui sortaient des mains de Mme Bertha. Les demandes de costumes pour enfants ne manquaient pas, surtout pour des noces, baptêmes et anniversaires.

Si on lui demandait jusqu’à quand elle pensait faire des bredzon, en rigolant elle répondait: «et bien vous savez, tant que je pourrai et puis quand on aime travailler, alors plus on en fait et plus on a envie encore d’en faire!»

Bertha était une figure typique du Val-de-Charmey. Le 11 juillet 87, à l’église de Charmey sonnait l’agonie, la mort était entrée dans sa maison. Elle avait 81 ans.

Enfant, j’ai le souvenir d’avoir passé devant Bertha pour prendre des mesures; mes parents m’avaient payé un costume d’armailli pour le dimanche, bredzon avec les pantalons courts.

Gérard Rime a Tônon Tsêrmê