Ti lè dou j’an, du li-ya dza dji j’an, la Tropa du Dzubyà rèmontè chu lè lan. Ma chti yan, l’è pâ a Chorin ke chin chè pàchèrè, ma a Vupin, a la Méjon dè Vela, a kouja ke le kabarè dou Chahyo a Chorin, l’è bohyâ.

Lè devindro nà è chèdzè dè fèvrê, pu lè dechando dji è dji-j’èchate, a vouèt’àre, è onko lè demindze ondzè è dji-j’èvouète dè fèvrê, a duvè j’àrè, vo jari l’èpâhyo dè vinyi onkoradj ha tropa dè téâtro ke dèfin nouthron patê.

Kemin no cherin a Vupin, Robert Botchu chè farè on piéji dè rètrachi la retse ichtouâre dè chon velâdzo avu chè dou tsathi yô di chinyà li-yon rênyi. Hou tsathi  chon bin intrètinyê è adi abitâ.

Po rèvinyi ou téâtro, la premire pithe «Portyè pâ no» d’Anne-Marie Yerly, rakontè le tsemin dè ya dè thin galapyà ke chon in mimo tin dèvan on mu yô on dèvenè lè pouârtè dou paradi. L’an tsakon ouna bouna réjon dè povê  li intrâ.

La chèkonda pithe «Chôpyé pâ in katson», dè Nono Pürro, chè pâchè din ouna méjon dè rèpou, yô dou panchenéro – on omo è ouna fèmala – chè chon muchi. Van-the lè rètrovâ? A vo dè vinyi a Vupin po le chavê.   

Vonvon Kolly

De Sorens à Vuippens

Tous les deux ans, depuis il y a déjà dix ans, la Troupe du Gibloux remonte sur les planches. Mais cette année, ce n’est pas à Sorens que cela se passera, mais à Vuippens, à la Maison de Ville, à cause que le café du Cercle, à Sorens, est bouclé.

Les vendredis 9 et 16 février, puis les samedis 10 et 17, à 20 heures, et encore les dimanches 11 et 18 février, à 14 heures, vous aurez l’occasion de venir encourager cette troupe de théâtre qui défend notre patois.

Comme nous serons à Vuippens, Robert Bochud se fera un plaisir de retracer la riche histoire de son village, avec deux châteaux où des seigneurs y ont régné. Ces deux châteaux sont bien entretenus et encore habités.

Pour revenir au théâtre, la première pièce «Pourquoi pas nous» d’Anne-Marie Yerly, raconte le chemin de vie de cinq vagabonds qui se trouvent en même temps devant  un mur où on devine les portes du paradis. Ils ont chacun une  bonne raison de pouvoir y entrer.

La seconde pièce «S’il-vous-plait pas en cachette», de Nono Pürro, se passe dans une maison de repos, où deux pensionnaires – un homme et une femme – se sont éclipsés. Vont-t-ils les retrouver? A vous de venir à Vuippens pour le savoir.

Vonvon Kolly