La dzà dè Vouthin chè tràvè bin pyantâye chu chi poyè intrè katro velâdzo. Chu chi mon, rin dè tsathi, ma dè la pâ dè Morlon, di balè têrè è ouna galéja yuva chu nouthrè ketsè. Li a dè chin on pâr dè j’an, l’an fê ha granta rèchêrva d’ivouè è betâ oun’antêna. Po chin, l’avan tayi on fyê tro de la dzà. Ora, l’è j’ârbro l’an bin rèprê.

Dè la pâ dè Tsarlin, on li tràvè kotyè klèryére yô lè ku-byan âmon bin marindâ. Kotyè renâ l’an prê lou mârkè din di viyo fèni.

Dè la pâ dè Rya, on galé tsemin rèdjin Bulo doulon dè Kudré. On arouvè adon a la fêrma dè Vouthin è pu tantyè ou Vêrdèl ; chi bin ke vouètè la vela dè tru pri…

Ma rèvinyin din chi l’indrê pêjubyo: la dzà. Prà dè mondo âmè li fére on toua. Din totè lè dzà, lè dzin rètràvon di fouârthè è de la nyarga. Chinbyè ke le tin è lè traka charithon. On pou mi rèchpirâ è vêre tan dè balè tsoujè po kô châ ch’èmêrvèyi dèvan la natura.

Ou mitin dè Vouthin, on rètràvè la pêra i tsahyà pri d’ouna viye karyére. Ha pêra l’è bin konyu di dzin dè Morlon. Me n’êmi Jean-Claude m’a de ke kan iran dzouno, chè bayivan chovin rindè-vo a ha pêra. Pâ gran mondo chavê l’ichtouâre dè ha pêra; panyi lè viyo dè Morlon a kô l’avê dèmandâ.

In fajin kotyè rètsêrtsè, l’é rètrovâ ke ha pêra l’a ouna dâta: 1892. Ha pêra in fouârma d’èkuchon l’a achebin ouna gruva churmontâye d’ouna krê fèdèrale. Ha pêra chèrè j’ou gravâye pê on avoka Morâ mouâ in mil-vouè-than-nonantè-katro. Chi Moncheu adon propryétéro dou bin dè Vouthin irè on gran patryote dou viyo Konté dè Grevire. L’è jou d’ayeu chèf di radikô dou dichtri è l’è on di fondateu dè nouthra gajèta La Grevire.

No chin chur pâ lè premi a pachâ din nouthrè dzà. Bin di j’arbro l’an yu nouthrè j’anhyan li pachâ è cheran kotyè pyantè, adi inke, po vêre hou ke van no chouêrdre. No chin tyè dè pachâdzo…

Romain Pittet

Vaucens

La forêt de Vaucens se trouve bien plantée sur ce « poyet » entre 4 villlages. Sur ce mont, pas de château mais du côté de Morlon, des belles terres et une jolie vue sur nos sommets. Il y a de ça un bon nombre d’années, ils ont fait ce réservoir et mis une antenne. Pour cela, ils avaient coupé un bon bout de la forêt. Maintenant, la végétation a bien repris.

Du côté d’Echarlens, on y trouve quelques clairières où les chevreuils aiment bien aller prendre leur souper. Quelques renards ont pris leurs marques dans des vieux fenils.

Du coté de Riaz, un joli chemin rejoint Bulle le long de Cudrex. On arrive alors à la ferme de Vaucens et jusqu’au Verdel ; ce domaine qui regarde la ville d’un peu trop près…

Mais revenons dans cet endroit paisible : la forêt. Beaucoup de monde aime y faire un tour. Dans toutes les forêts, les gens retrouvent des forces et de l’énergie. Il semble que le temps et les tracas s’arrêtent. On peut mieux respirer et voir tant de belles choses pour qui sait s’émerveiller devant la nature.

Au milieu de Vaucens, on retrouve la pierre aux chasseurs près de l’ancienne carrière. Cette pierre est bien connue des gens de Morlon. Mon ami Jean-Claude m’a dit que dans sa jeunesse, ils se donnaient rdv à cette pierre. Pas grand monde savait l’histoire de cette pierre ; pas même les anciens à qui il avait demandé.

En effectuant quelques recherches, j’ai retrouvé que cette pierre avait une date :1892. Cette pierre en forme d’écusson a aussi une grue surmontée d’une croix fédérale. Ce caillou aurait été gravé par un avocat Morard décédé en 1894. Ce monsieur alors propriétaire du domaine de Vaucens était un grand patriote du vieux Comté de Gruyère. Il a été d’ailleurs chef des radicaux du district et il est un des fondateurs de notre gazette La Grevire.

On est sûr pas les premiers à passer dans nos forêts. Bien des arbres ont vu nos aïeux y passer et ils seront quelques plantes, encore là, pour voir ceux qui nous suivront. On est simplement de passage…

Romain Pittet