La chenanna pachâye è chta chenanna, la fanfare dou Mourè l’a betâ chu pi on grô chpèktàkle po chon than-chaptantyimo anivèrchéro.

Ichtouâre dè «Grease» rèvin chu chi film ke l’a markâ lè gènèrachyon. Po chin fére, la fanfare dzuyè la mujika, on kà tsantè è ouna binda dè dzouno danhyon, tsanton è dzuyon la komèdiya. Tyin pyéji dè vêre chin! On grô travô ke meretè d’ithre rèlèvâ. La châla dè sport dè chi velâdzo irè bondâye. Totè hou mujikè no bayivan l’invide dè danhyi, tsantâ è budji!

Chin ke m’a markâ on bokon, l’è k’on rèkonyè to tsô ke no j’an afére a on publike reman. Ouê, ouê, vêr no, lè dzin l’an dou mô dè ch’ètsoudâ… Vê nouthrè vejin chuiche-aleman, kan li a dè la bouna mujika, lè dzin ch’abadon po danhyi. Vêr no, l’an dza dou mô dè fyêre di man. Chin mè rapalo l’an pachâ, a la fitha di mujikè ou Patchi. Le devindro né, l’an fê on farmo bi konchê avui ti lè dzouno menèthrê de la Grevire è Lisa Stoll ou kouâr di vani. Chin irè ôtyè dè bi! Ti hou j’infan l’an j’ou on pyéji monchtro. A la fin dou konchê, ti hou dzouno iran abadâ chu lè lan po dzuyi dou Johnny; vo moujâdè bin ke chin i betè dè l’anbyanthe! È apri l’an rèbetâ ouna kutse avui nouthron bi Lyôba è Lisa. È bin môgrâ to chin, tyè dutrè dzin chè chon abadâ din la kantine… bin damâdzo po hou brâvè dzouno. Vê nouthrè vejin, rin dè chin!

Yô li a de la dzêna, rin dè pyéji, tyédè ! Adon a no dè mothrâ ke lè reman achebin, chàvon chè dèmorâ è chotinyi adrê totè nouthrè balè kothemè ke totson a la mujika!

Tsantâdè, danhyidè, dzuyidè è oubyâdè pâ dè fyêre di man kan la mujika vo j’in bayè l’invide!

Romain Pittet

Chantez, dansez, jouez !

La semaine passée et cette semaine, la fanfare du Mouret a mis sur pied un grand spectacle pour son 170eme anniversaire.

 «Histoire de Grease» revient sur ce film qui a marqué les générations. Pour ce faire, la fanfare joue la musique, un cœur chante et une équipe de jeunes dansent, chantent et jouent la comédie. Quel plaisir de voir ça! Un grand travail qui mérite d'être relevé. La salle de sport de ce village était bondée. Toutes ces musiques nous donnaient l'envie de danser, chanter et bouger.

Ce qui m'a marqué un peu c'est qu'on reconnaît tout de suite que nous avons à faire à un public romand. Oui, oui, chez nous, les gens ont du mal de se réchauffer. Chez nos voisins suisses-allemands, quand il y a de la bonne musique, les gens se lèvent pour danser. Chez nous, ils ont déjà du mal de taper des mains… Ceci me rappelle l'année passée, à la fête des musiques au Pâquier, le vendredi soir, ils ont fait un très beau concert avec les jeunes musiciens de la Gruyère et Lisa Stoll au cors des Alpes. Ça c'était quelque chose de beau! Tous ces enfants ont eu un monstre plaisir! A la fin du concert, tous ces jeunes étaient debout sur la scène pour jouer du Johnny ; vous pensez bien que cela a mis de l'ambiance et après ils ont remis une couche avec notre beau Lyôba et Lisa. Eh bien malgré tout cela, seulement quelques personnes se sont levées dans la cantine. Bien dommage pour ces braves jeunes. Chez nos voisins, rien de ça.

Où il y a de la gêne, il n'y a pas de plaisir, n'est-ce pas ! Alors à nous de montrer que les romands aussi savent s'amuser et soutenir correctement, comme il se doit, toutes nos belles coutumes qui touchent à la musique!

Chantez, dansez, jouez et n'oubliez pas de taper des mains quand la musique vous en donne l'envie!

Romain Pittet