Dji j’àrè: le kou lè teri, du la gâre dou Patyi, pachâ katre than korèri ch’inmodon po katouârdzè kilomêtre. On kou fro dou velâdzo, dirèkchyon lè Grandzè in pachin intrèmi di fêrmè. Dza inke, di dzin chon vinyê inkoradji. Ouna premire pitita montâye po rèdjindre Londze-kuva. Inke, on po vêre Rolan Proudzin in trin dè boutekâ outoua dè cha fêrma. On kou pachâ le pon de la Trêma, on prin on piti chindê din la dzà a la ruva dè Kutyèrin. To por on kou, on rèdèchin avô le ryô. On pâchè on piti pontè dèvan dè rèmontâ vê le chindê di pouro. On kou pachâ le kovin de la Pâ-Dyu, tinke no rè chu la route de la Chya. Pâ po gran tin puchke on tsemin no j’atin po rèdjindre le patyi de la Tofêre. I montè balébin, l’è pâ fachilo… di kou on chè dèmandè tyin l’idé no j’an j’à dè ch’inbrigadâ avui chin.…