Po prà dè dzin, le korbé l’è nè le pye chejin nè le pye bi di j’oji. La nêrèya dè chon pyumâdzo è cha vouê routhe foton la pi d’ouye a bin kotyè j’on. N’in d’a ke dyon: l’è le mèchadji dou mâlà, le konpanyon dou focheryà. D’ôtro deron ke cherè djêmé tsancholè din on kà, ke porè djêmé dèkrotchi le premi pri d’on konkour d’inpyumâ. Le poête Djan Dou No, kontâvè din ouna dè chè poèji, ke l’irè rintyè on galapyâ, djuchto kapâbyo dè chè fére inrouthâ pê lè bi pridzo dou rochè.

In ginyin l’afére dè pye pri, chi l’oji to nê l’è pâ ache krouyo tyè chin. Kan l’y a j’ou chi tarubyo dèludzo ke no rakontè la Bible, cherê-the pâ le korbé ke l’è vinyê avu ouna brantsèta d’olivyé din chon bè, anonhyi a Noé ke la têra irè chètse è rè akuyinta?

Bin chur tyè di kou, i mènôn le trin a la peka dou dzoua,…