Iro bin dzouna, poutithre dodz’an. No j’iran in invela vê ma tanta Louise.Tan bouna dzin ha tanta. Ma, i chavê mi le patê tyè le franché. To por on kou, i mè di: «Tu veux un morceau de bon-an?»

L’i é teri di grô j’yè, mè chu verya vê ma dona. Tyè ke l’è chin? Ma dona è ma tanta l’an bin ruju. M’an adon èchplikâ ke la trèthe chè dejê dou Boun’An.

Le premi dè l’an… don! N’in medjivan dza le dèvêlené dè la Chin Chavithro, po fithâ le Viyo-è Novi. Galéjè fithè dè famiye, yô i chè dèmorâvan trantyilamin, in tot’amihyâ. La kuchôla, ou kontréro, chè fajê po la Bènichon, è din mon velâdzo achebin po la Chin Piéro, le patron de la parotse. La trèthe irè fête po le premi dè l’an. Inke portyè l’i dejan le Boun’An.

L’è achebin in tot’amihyâ ke vo kouâjo on «Bon Dzoua dè Boun’An»; è pâ rintyè po chi…