Du mile nouthin djij’è chate, le Mujé gruvèrin rèkordè è betè in vayà l’èretâdzo dè la Grevire. Chityi a dou pâ dou kà ichtorike dè Bulo, la bâtiche dè vouè, bâtya in mile nouthin chaptant’è vouète, pu agrochya din lè j’an dou mile, abèrdzè achebin la bibyotêka dè Bulo. Ou dzoua d’ora, l’inchtituchyon l’è vejetâye pê di djijannè dè mile pèrchenè. L’è to l’an ourâye chê dzoua pê chenanna.

A travê chè j’inportintè kolèkchyon dè badyè, d’èmâdzè è dè dokumin, le Mujé gruvèrin bayè a kondji dè chè tinprâ din le tin pachâ dè la kotse è dè chè j’ârmè. Ouna redâye d’ouvrâdzo tèmonyon dou jèni di j’artichte gruvèrin.

Lè kolèkchyon dou mujé rètrachon la mârtse in’an dè la ya dè ti lè dzoua din lè farmè, dè la fathon dè trintchi, dou komêrche dou grevire, dou travô din lè j’induchtri (bou, lathi, paye), di j’andrenâyè in vela dè Bulo è dè la piyètâ. La tsèvanthe, ke la kotse l’è rèdèvâbyo ou fre, on pou la vêre din le dèkouâ di farmè, di poya è di trin dè tsalè, din la vayà di vithirè è dou mobiyi.

Din ouna pâ dou mujé, on l’i tràvè la bibyotêka ke betè a dichpojichyon, di pye grô kemin di pye piti, d’inportintè kolèkchyon dè lêvro, dè rèyuvè è dè viyè gajètè. L’è in fouênin din hou viyo papê ke l’é dèniyi la patarafa ke dèvejâvè dè Nanèta-Mariè-Fanchèta Tinguely, la Pitita Marianna k’on rètràvè din la trèjima kobya dè la tsanthon « La Poya » è ke l’è in bon rèpou a l’anhyan chimetyéro dou Kabalè, a kotyè j’èchtrapâyè dou mujé.

Adon le nà dè jouin, por bayi l’èpâhyo ha bala l’inchtituchyon d’ithre rènovalâye, amâbyè j’ârmè dè Bulo è dè La Toua, n’àbyâdè pâ dè dzubyâ on OUÊ din l’urna. Dinche, nouthrè j’anhyan, nouthron payi, cha linvoua è chè kothemè chàbrèron po totèvi gravâ  din nouthrè chovinyi.

Bèrnâ Chaney

Le Musée gruérien

Depuis 1917, le Musée gruérien étudie et met en valeur l’héritage de la Gruyère. Situé à 2 pas du centre historique de Bulle, le bâtiment d’aujourd’hui, construit en 1978, puis agrandi dans les années 2000, héberge aussi la bibliothèque de Bulle. Aujourd’hui, l’institution est visitée par des dizaines de milles personnes. Elle est toute l’année ouverte 6 jours par semaine.

A travers ses importantes collections d’outils, d’images et de documents, le Musée gruérien permet de se tremper dans le temps passé de la région et de ses habitants. Une quantité d’œuvres témoignent du génie des artistes gruériens.

Les collections du musée retracent la marche en avant de la vie de tous les jours dans les fermes, de la façon de fabriquer le fromage, du commerce du gruyère, du travail dans les industries (bois, lait, paille), des activités en ville de Bulle et de la piété. La prospérité, dont la région est redevable au fromage, on la retrouve dans le décor des fermes, des « poyas » et des ustensiles du chalet, dans la valeur des vêtements et du mobilier.

Dans une part du musée, on y trouve la bibliothèque qui met à disposition, des plus grands comme des plus petits, d’importantes collections de livres, de revues et de vieux journaux. C’est en fouinant dans ces vieux journaux que j’ai déniché un texte qui parlait d’Anne-Marie-Françoise Tinguely, la Petite Marianne que l’on retrouve dans le troisième couplet de la chanson « La Poya » et, qui repose à l’ancien cimetière du Cabalet, à quelques enjambées du Musée gruérien.

Alors le 9 juin, pour donner l’occasion à cette belle institution d’être restaurée, aimables habitants de Bulle et de La Tour, n’oubliez pas de glisser un OUI dans l’urne. Ainsi, nos ancêtres, notre pays, sa langue et ses coutumes, resteront pour toujours gravés dans nos souvenirs.

Bernard Chaney