Apri la fondachyon d’la chochyètâ di dzouno dè Machin in mil-nouthin thinkantè-dou, mè chovinyo ke prâ dè kopin tsertchivan in dèpye ôtyè ke pouéchè lè j’intèrèchi. L’è dinche ke di dzouno dè mon velâdzo chon jou din lè premi a chingadji din la novala chochyètâ dè mujika dè Riaz, fondâye in mil-nouthin thinkantè-katro.

Por mè, l’è le tsan è le téâtro ke mè kovinyan le mi. No dzuyivan ouna komèdiya apri lè loto dou kà mixte ou bin d’la dzounèche. In mil-nouthin thinkantè-vouète, no no  chin lanhi din ouna puchint’aventura in betin chu pi Lè Duvè Orfenè. No j’iran ouna trintanna d’akteu. L’è jou ouna bala rauchête. Chi téâtro l’è jou bayi din la bala  châla d’la Kri Byantse dè Machin. Lè dzin n’in rèdèmandâvan, ma no j’avan pâ mé dè dâtè badêre.

Chi ke no j’a intrinâ din ha bal’aventura l’avi a non Djan-Luvi Patchi, on dzouno dè vint’an, pyin dè bounè j’idé. Chi Djan-Luvi Patchi l’a pachâ tota cha ya din la tsèvanthe dou lathi. Lè dêri j’an l’a bayi to chon chavê i dzouno d’l’Ekoula di fretchi dè Grandzenâva.

Avu mè ti hou k’lan konyu vouêrdèron on bi chovinyi dè li ; i vin dè no tchithâ to dariremin a vouètantè-chi j’an. 

Vonvon Kolly

J’étais jeune dans les années cinquante

Après la fondation de la Société de jeunesse de Marsens en  1952, je me souviens que beaucoup de copains cherchaient en plus quelque chose qui puisse les intéresser. C’est comme ça que des jeunes de mon village ont été dans les premiers à s’engager dans la nouvelle société de musique de Riaz, fondée en 1954.

Pour moi, c’est le chant et le théâtre qui me convenaient le mieux. On jouait une comédie après les lotos du chœur-mixte ou bien de la jeunesse. En 1958, nous nous sommes lancés dans une puissante aventure en mettant sur pied Les Deux Orphelines. On était une trentaine d’acteurs. Ça été une réussite. Ce théâtre a été donné dans la belle salle de la Croix-Blanche de Marsens. Les gens en redemandaient, mais nous n’avions plus de dates à disposition.

Celui qui nous a entrainés dans cette belle aventure, s’appelait Jean-Louis Pasquier, un jeune de 20 ans, plein de bonnes idées. Ce Jean-Louis a passé toute sa vie dans la promotion du lait. Les dernières années, il a donné tout son savoir aux jeunes de l’Ecoles des fromages de Grangeneuve.

Avec moi, tous ceux qui l’ont connu garderont un beau souvenir de lui ; il vient de nous quitter tout dernièrement à l’âge de 86 ans.

Vonvon Kolly