La chenanna pachâye, le velâdzo dè Vuadin l’a akuyi dou mondo in mache po lè RJG.

Totè lè dzounèchè de la Grevire chè chon rètrovâyè po chè travunyi chu di dju è chavê nekoué porè organijâ ha grôcha fitha l’an ke vin. Dechando matin, on pechin kortéje l’a travêchi le velâdzo djuchto dèvan la pyodze. Totè lè chochyètâ chè chon bayi du chti furi por invintâ, fabrekâ, inkotyi è kàdre di bi j’âyon è di bi tsê. Kemin l’an pachâ, lè dzin chon jou chorèprê dè vêre la kalitâ dou travô dè hou dzouno. La dzounèche dè La Rotse l’a markâ lè j’èchpri avui chon farmo bi tsê è chè vihyirè dè kalitâ. L’è pâ chovin ma chti an, l’an gânyi lè premi pri dou tsê, di j’âyon è di dju! è l’è bin meretâ!

La dzounèche dè Vuadin, invrenâye dè chon komité d’organijachyon meretè achebin on gran bravô! L’an organijâ ha fitha dè man dè mêtre è to chè bin pachâ. On bokon tru dè pyodze pout-ithre ma l’è pâ chin ke la inpatyi lè dzin d’avi dou chèlà din le kà!

Lè Rinkontrè di Dzounèchè Gruvèrênè, l’è on travô monchtro, ma i fan tan dè bin po nouthra kotse! Fô dre ke l’è pâ tyè lè dzouno ke chè rètràvon ma tota la Grevire! Lè parin, lè mér’gran è pér’gran, lè j’infan… totè lè gènèrachyon chè mèhyon (mé tyè dèvan) è totè lè famiye dè nouthra kotse chè rètràvon po pachâ di momin dè dzouyo. Lè RJG rèprèjinton le nouayô dè la Grevire è chon farmo inportintè po ke lè dzouno è lè min dzouno puyon fére konyechanthe è rindre cholido lè lin intrè lè dzin dè nouthra Grevire.

On chè rèdzoyè dza d’alâ a Bro l’an ke vin!

Chin l’è bi !

Romain Pittet

Monstre plaisir!

La semaine passée, le village de Vuadens a accueilli beaucoup de monde pour les RJG.

Toutes les jeunesses de la Gruyère se sont retrouvées pour s’affronter sur des joutes sportives et savoir qui pourra organiser cette grande fête l’année suivante. Samedi matin, un puissant cortège a traversé le village juste avant la pluie. Toutes les sociétés se sont données depuis ce printemps pour inventer, préparer, fabriquer et coudre de beaux habits ainsi que de magnifiques chars. Comme l’an passé, le public a été surpris de voir la qualité du travail de ces jeunes. La jeunesse de La Roche a marqué les esprits avec son char extraordinaire et ses magnifiques habits. Ce n’est pas souvent, mais cette année, ils ont gagné les premiers prix du char, des costumes et des jeux! et c’est bien mérité!

La jeunesse de Vuadens entourée de son comité d’organisation mérite aussi un grand bravo! Ils ont organisé ça d’une main de maître et tout s’est très bien déroulé. Un peu trop de pluie peut-être mais ce n’est pas cela qui a empêché les gens d’avoir du soleil dans le cœur!

Les Rencontres de Jeunesses Gruériennes, c’est un immense travail, mais elles font tant de bien pour notre région! Il faut dire que ce n’est pas que les jeunes qui s’y retrouvent mais toute la Grevire ! Les parents, les grands-mamans, les grands-pères, les enfants,… toutes les générations se mélangent (plus qu’avant) et toutes les famille de notre région se retrouvent pour passer de bons moments de joie. Les RJG représentent le noyau de la Gruyère et elles sont très importantes pour que les jeunes et moins jeunes puissent se connaître et rendre solides et forts les liens entre les personnes de notre Grevire.

On se réjouit déjà d’aller a Broc l’année prochaine!

Chin l’è bi!

Romain Pittet