M’in vé vo kontâ on chovinyi ke mon pér’gran Frèdon Yêrle amâvè bin rèchayi.

In mil’nouthin-thinkanta, l’è j’ou bouébo dè tsalè pê lè j’Avatchè po chè ch’onhyo. L’avê trèdz’an. On kou, l’avê dzubyâ ché pâ yô è ch’irè frèjâ ‘na pyôta. L’è adon dèchindu chu lè j’èpôlè d’on armayi tanty’a la fêrma dè la famiye Tsapalê. On kou lé, kôkon irè vinyê le tsartyi por alâ vê le mêdzo.

Ma le pye grô chovinyi ke l’avê dè chon premi grade dè bouéb’dè tsalè amon i j’Avatchè, irè le premi dou mi d’ou. L’è chi dzoua ke lè j’armayi pachâvan le velâdzo dè Tsarmê po rèmouâ le tropi tanty’a la Djithe-d’Avô. La Djithe-d’Avô ke l’è ora la buvèta ke l’avi fê Boudji.

Dèvan dè rèmouâ to le trin, fayi rèmouâ lè pouê. Hou portà dè tsanbètè dèvechan modâ kotyè j’àrè dèvan po arouvâ in mimo tin. L’è j’armayi l’an adon de a mon pér’gran Frèdon dè modâ cholè avui chi tropi dè piti kayon. Arouvâ in Tsarmê, moujâdè bin ke le bouébo l’avi chê! Avui ti hou kabarè l’a j’ou drê a bin kotyè vêro ma… rin di koka è dè té-frê in chi momin ! Dou byan ! In arouvin djuchto dèvan la Tsintre po prindre le tsemin dè Mothèlon, mon pér’gran dejê ke vêyê ti hou vani li veri ou toua dè cha titha è ke lè montanyè chon djamé j’ou ache grôchè tyè chin…

Djuchto dèvan d’arouvâ a la Djithe-d’Avô, tyin dzouyo por li d’oure lè hyotsètè è dè vêre che n’onhyo Bènouâ arouvâ avui le tropi dè j’armayè.

On galé chovinyi dè mon pér’gran avui chon tropi dè kayon !

Romain Pittet-Yerly

Petits cochons du mois d’août

Je vais vous raconter un souvenir que mon grand-papa Frèdon Yerly aimait bien ressortir.

En 1950, il a été garçon de chalet par les Avatchè pour ses oncles. Il avait 13 ans. Une fois, il avait glissé je ne sais où et s’était cassé une jambe. Il est alors descendu sur le dos d’un armailli jusqu’à la ferme de la famille Chapalley. Une fois là-bas, quelqu’un était venu le chercher pour aller chez le docteur.

Mais le plus grand souvenir qu’il avait de son premier grade de bouéb’dè tsalè en haut aux Avatchè, c’était le premier août. C’est ce jour-là que les armaillis passaient le village de Charmey pour remuer le troupeau jusqu’à la Djithe-d’Avô. La Djithe-d’Avô qui est maintenant la buvette qu’avait fait Boudji.

Avant de remuer tout le train, il fallait remuer les cochons. Ces porteurs de jambonneaux devaient partir quelques heures avant pour arriver en même temps. Les armaillis ont alors dit à mon grand-papa Frèdon de partir seul avec ce troupeau de petits cochons. Arrivé à Charmey, pensez bien que le bouébo avait soif ! Avec tous ces bistrots il a eu le droit à bien quelques verres mais… rien de coca ou de thé froid en ce temps-là ! Du blanc ! En arrivant juste avant la Tsintre pour prendre le chemin de Motélon, mon grand-papa disait qu’il voyait tous ces vanils tourner autour de sa tête et que les montagnes n’ont jamais été autant grandes que ça…

Juste avant d’arriver à la Djithe-d’Avô, quelle joie pour lui d’entendre les cloches et de voir son oncle Benoît arriver avec le troupeau de vaches.

Un joli souvenir de mon grand-papa avec son troupeau de cochon !

Romain Pittet-Yerly