La chenanna pachâye, in vela è din lè pyannè dè nouthron tyinton, iré le Rèkrotson. Avui ouna binda de la dzounèche dè Rya, no chin j’ou rèkrotsenâ din la Yanna, a Mide. Portyè din chi velâdzo ? È bin, no j’an fê konyechanthe dè hou galéjè dzin in voyâdzo in Kroachi li a dè chin dou j’an è du inke, no chin chobrâ di bon j’êmi.

Fâ dza ‘na vouêrba k’on voli li alâ… è bin, vo le dyo, no chin jou têrubyamin bin rèchu ! In arouvin, tyinta bala chorèprêcha dè vêre hou tsanbètè, hou linju è ha bouna choupa i tsou kouêre trintyilamin din di romênè… Irè on bokon l’atrakchyon dè l’apèrô!

Apri chin, no chin pachâ a trâbya è no j’an medji kemin di... kemin di gruvèrin ! Ma irè tan bon chi goutâ !

On kou le charvucho fournê, irè ou toua di dzouno dè Mide dè lèvâ lè danthè. Ouê ouê, tota la dzounèche l’è jou chu le pon po danhyi ! Chin l’è bi !

In Grevire, yô puyin-no vêre chin ou dzoua d’ora? Fô le dre, din la Yanna è din la Brouye, l’an chu chin mi vouêrdâ tyè no. Prà dè chochyètâ dè dzounèchè mintinyon la danthe po la Bènichon ou le Rèkrotson.

Bravô a ti hou dzouno ke chè bayon po mantinyi nouthrè balè kothemè è Marthi a la chochyètâ dè dzounèche dè Mide po l’akuyo è le bi momin pachâ vêr là! Romain Pittet

Le Rèkrotson dans la Glâne

La semaine passée, en ville et dans les plaines de notre canton, c’était le Rèkrotson. Avec une équipe de la jeunesse de Riaz, nous avons été « rèkrotsoner » dans la Glâne, à Middes. Pourquoi dans ce village ? Et bien, nous avons fait connaissances de ces braves gens en voyage en Croatie il y a 2 ans et depuis là, nous sommes restés de bons amis.

Ça fait déjà un moment qu’on voulait y aller… et bien, je vous le dis, nous avons été terriblement bien reçus ! En arrivant, quelle belle surprise de voir ces jambons, ces saucissons et cette bonne soupe aux choux cuire tranquillement dans des romaines… c’était un peu l’animation de l’apéro !

Ensuite, nous sommes passés à table et nous avons mangé comme des… comme des gruériens ! Mais il était tant bon ce dîner !

Une fois le service terminé, c’était au tour des jeunes de Middes de lever les danses. Oui, oui, toute la jeunesse a été sur le pont pour danser ! Chin l’è bi !

En Gruyère, où pouvons-nous voir ça au « jour d’aujourd’hui » ? Faut le dire, dans la Glâne et dans la Broye, ils ont mieux su garder cela que nous. Beaucoup de sociétés de jeunesses maintiennent la danse pour la Bènichon ou le Rèkrotson.

Bravo à tous ces jeunes qui se donnent pour maintenir nos belles coutumes et Merci à la société de jeunesse de Middes pour leur accueil et le beau moment passé chez eux ! Romain Pittet