Demindze pachâ, la chochyètâ di patêjan de la Grevire l’a fithâ chè karant’an. Pâ bin viye ha chochyètâ ! È portan, li a dza bin pye grantin ke di dzin chè beton inthinbyon po chotinyi è tsévanhyi nouthron patê. Ma in Grevire, on dejê ke le patê irè prou dèvejâ è on trovâvè ke li avê pâ fôta d’ouna chochyètâ. Bèniràjamin, di dzin n’in d’an fondâ ouna è du inke, prà d’afére chon jou fête po la tsèvanthe dou patê.

Chi bon goutâ charvi pâ la dzounèche dè Màlè l’a rathinbyâ on mache dè mondo din le velâdzo dè l’abé Bovè. Le kà dè mohyi no j’a tsantâ di galé tsan è prà dè dzin l’an prê la parola. Li a mimamin kotyè prèkô k’iran inke. Fô rèlèvâ ke nouthron prèfè, moncheu Bochon è nouthron konchiyé, moncheu Kachtlâ l’avan betâ le bredzon è chè chon betâ ou patê por inkotyi lou dichkour. Chin fâ pyéji è on èchpêro ke ha dzornâye lou j’a fê prindre konchyanthe ke la linvoua dè nouthron dichtri l’è adi in ya è ke li a ôtyè a fére!

On gran bravô a to le komité è chon prèjidin d’avi betâ in pyathe ha fitha, l’an prê fêrmo pêna è on l’è rèmârhyo grô !

Bouna fin dè chenanna, 

Romain Pittet

Le quarantième

Dimanche passé, la société des patoisants de la Gruyère a fêté ses 40 ans. Pas bien vieille cette société ! Et pourtant, il y a déjà bien plus longtemps que des gens se mettent ensemble pour soutenir et promouvoir notre patois. Mais en Gruyère, on disait que le patois était assez parlé et on trouvait qu’il n’y avait pas besoin d’une société. Heureusement, des personnes en ont fondé une et depuis ce jour, beaucoup de choses ont été élaborées pour la promotion du patois.

Ce bon dîner servi par la jeunesse de Maules a rassemblé du monde en masse dans le village de l’abbé Bovet. Le chœur mixte nous a chanté de jolis chants et beaucoup de personnes ont pris la parole. Il y avait même quelques politiciens qui étaient là. Il faut relever que notre préfet, M. Bosson et notre conseiller M. Castella avaient mis le bredzon et ont relevé le défi de se mettre au patois pour préparer leur discours. Ça fait plaisir et on espère que cette journée leur a fait prendre conscience que la langue de notre district est encore en vie et qu’il y a quelque chose à faire !

Un grand bravo a tout le comité et son président d’avoir organisé cette fête, ils ont pris beaucoup de peine et on les remercie chaleureusement !

Bonne fin de semaine,

Romain Pittet