La yê l’è chépra, ou bi dè lena, din le cherin dè la né, lè pêrlè ardzintenâyè dè la rojâye ch’in vinyon bregolâ la koràla di hyà. In lè frounin, fâchèyà, on piti chi lè fâ a chè dzubyâ chu la toupa.
Achètâ, a la frètyà d’on foyâdzo, i lécho mè nari achounâ, avui tindrèthe, le chonnabon d’on lila akrotchi a ouna brantse in dèchu dè mè.
You hé ! L’è le furi !
A la lijyére dè la dzà, idji dè lou vouê dè tsantèryô, dou ranchinyolè teron fro du chon chondzo Monchènyeu le furi ke fâ adi ouna pitita chumiya.
Chu le lindâ dè ma pouârta, vuthu dè lou bredzon è dzakiyon, lè mayintsètè léchon ch’ètsapâ d’intrè lou marmàlè lè balè notè d’on redzingon ke rètsoudè mon kà :
You-hé ! Lè ryondênè chon rèpri, l’è le furi !
Ou pi di vani, gotrâjè è tchotro pointon le bè dè lou nâ, la poya ch’aprotsè. Dyora, l’armayi è chon tropi chè betèron in vi po la montanye. In oyechin la rèthrenâye di chenayè, mon kà brinè d’alègranthe.
You hè ! L’è le furi !
Dè la pâ dè Morlon, po Pèratson è cha Mayèta, l’àra dè rogatâ l’è arouvâye. Tyè Dyu konchèrvè lou konol, lou kayon, lou dzeniyè è lou kurtiyâdzo.
You hé ! L’è le furi !
Bèrnâ Chaney
You hé ! C’est le printemps !
Le ciel est pur, au clair de lune, dans la sérénité de la nuit, les perles argentées de la rosée s’en viennent orner la coraule des fleurs. En les frôlant, farceur, un petit courant les fait se glisser sur l’herbe.
Assis, à la fraîcheur d’un feuillage, je laisse mes narines renifler, avec tendresse, le parfum d’un lilas suspendu à une branche en dessus de moi.
You hé ! C’est le printemps !
A la lisière de la forêt, aidés de leur voix de mélomane, deux rossignols sortent de son rêve Monseigneur le printemps qui fait encore une petite sieste.
Sur le pas de ma porte, vêtus de leur bredzon et dzaquillon, les petits chanteurs du premier mai laissent s’échapper d’entre leurs lèvres les belles notes des refrains qui réchauffent mon cœur.
You hé ! Les hirondelles sont de retour, c’est le printemps !
Au pied des vanils, narcisses et boutons d’or pointent le bout de leur nez, la poya s’approche. Bientôt, l’armailli et son troupeau se mettront en chemin pour la montagne. En écoutant l’écho des sonnailles, mon cœur balance d’allégresse.
You hé ! C’est le printemps !
Du côté de Morlon, pour Pierre et sa Mariette, l’heure d’aller aux rogations est arrivée. Que Dieu préserve leurs lapins, leurs cochons, leurs poules et leurs légumes.
You hé ! C’est le printemps !
Bernard Chaney