L’ichtouâre ke vo konto inke l’è vèrèdika, è chè pachâye l’i a dza on bon nonbro d’anâye din on tsêrman velâdzo d’la Charna. Le gâpyon dou yu dèvechê batchi. On bi poupon chin chè fithè. Nouthron gabelou l’avê dèchidâ dè fére on grô rèpé dè batchimo, on rèpé dè rèthèta. On galé apèro è po le pya princhipal d’la tsanbèta dè fêrma, di pan dè bakon è di linju, bin chure to chi komêrche bin foumâ a la bouârna, a la mouda d’antan. Nouthron gâpyon kô konyechê on’êmi payijan, li avê rèjêrvâ ha martchandi è konvinyê po na levrèjon a la karâye dè l’eureu pére.

On dzoua, le payijan l’è vinyê a cha méjon li aportâ cha kemanda, l’i a hyotsatâ mé don kou, ma pâ dè rèponcha. Le gendârme èthê dè chèrvucho è cha fèna èthê onkora a la klinike. «Non dètsin! Tyè mè fô fére dè ha tsê?» moujâvè le payijan.…