Demindze pachâ, no chin jou tsantâ la mècha avui le kà de l’Intyamon ou Gran-Chin-Bèrnâ.
Tyin bi momin din chi mohyi yô i achintâvè le dzouyo è le partâdzo. Le chanouâne l’a bin pridji avui di mo ke dèvejon a to le mondo. Mimamin hou ke kortijon pâ tru lè mohyi l’an jou dou bouneu d’akutâ hou balè parolè. Chin fâ dou bin kan on krijè di dzin ke châvan onko dèvejâ dou Bon-Dyu avui dou vré, dè l’Amour è dè l’èchpèranthe.
Din ha kotse, on achin ôtyè dè bon. L’ochpitalitâ è la bontâ di dzin, le fôri è le dzouyo, ch’èmèrvèyi dèvan la byoutâ de la montanye, … to chin fâ ke la Fê dè tsakon l’è préjinta. Lé d’amon, l’an konprê è i fan a konprindre i dzin ke Dyu l’è préjin din le partâdzo, din lè fôri, din lè bounè vouêrbè dè dzouyo è din l’ochpitalitâ di dzin. Pâ fôta dè grôchè chtatu d’ouâ, pâ fôta dè retsèthe è dè blabla. La veretâ lè din le kà di dzin.
Ou Gran-Chin-Bèrnâ, l’omo l’è tyè dè pachâdzo… Du pachâ mil’an, di dzin chè chon rinpyathi po idyi è akuyi lè j’ôtro ; chin oubyâ lè tsin ! È dèvan chin, li avê dza la préjinthe d’on tanple romin è d’ôtrè krèyanthe.
La montanye n’in d’a yu dou mondo è kan te la vouêtè in fathe, i chinbyè ke tè chohyè chi mèchâdzo : « Chàbra pi a ta pyathe piti ; tè te pâchè, mè i chàbro… »
Romain Pittet
Le Grand-Saint-Bernard
Dimanche passé, nous sommes allés chanter la messe avec le Groupe choral Intyamon au Grand-Saint-Bernard.
Quel beau moment dans cette église où resplendissait la joie et le partage. Le chanoine a fait un beau sermon avec des mots qui parlent à tout le monde. Même ceux qui ne fréquente pas trop les églises ont eu plaisir d’entendre ces belles paroles. Ça fait du bien quand on croise des gens qui savent encore parler du Bon-Dieu avec vérité, Amour et espérance.
Dans ce coin, on ressent du positif. L’hospitalité et la bonté des personnes, les sourires, la joie, s’émerveiller devant la beauté de la montagne, … tout cela fait que la Foi de chacun est présente. Là-haut, ils ont compris et font comprendre à qui le veut bien que Dieu est présent dans le partage, dans les sourires, dans les moments de joie et dans l’hospitalité de chacun.
Au Grand-Saint-Bernard, l’Homme n’est que de passage… Depuis passé 1000 ans, une multitude de personnes se sont succédé pour aider et accueillir les autres ; sans oublier les chiens ! Et avant cela, il y avait déjà la présence d’un temple romain et d’autres croyances.
La montagne en a vu du monde et quand tu la regardes en face, il semble quelle te souffle ce message : « Reste à ta place petit ; toi tu passes, moi je reste… »
Romain Pittet