Deché-delé

L’é fê na dèkouvêrta, pâ pye tâ tyè chti matin. Ouna lorda motse, bin grâcha, rôdâvè chu mon ruthi, prè a betâ ou foua. L’é inpunyê le tya-motsè… pu, to por on kou l’é yu pachâ na ryondêna dèvan ma fenithra.

Mè chu moujâ: «I vé tyâ le goutâ a la ryondêna!» Adon, l’è ourâ la fenithra è tséhyi fro la motse. Le tya-motse fournethrè a la dètsêrdze.

Che lè j’oji vinyon pa-mé, l’è ke l’an rin mé a medji. Lè to chinpyo. L’i a kotyè j’an, in Irlande, no j’an yu ôtyè d’afriyà: on tropi dè vatsè ke l’avan bin chure dza, rin-mé dè kouârnè, ma achebin la kuva rounya a tyindzè thantimêtre. Hou pourè bithè iran inbroulâyè dè ché pâ tyinta bourtyâ, kontre lè motsè! Pâ-mé fôta dè chè motsatâ avu la kuva. Rin-mé dè kuva, rin-mé dè motsè, pâ-mé on oji!

Kan on moujè kemin la natura l’è bin fête,…