Deché-delé

Chi tsôtin, l’è bin tsô. Ti lè dèvêlené, i féjo la korcha a la kokache! Ma, chin mè grâvè rin, le kurti ch’in rèdzoyè, è mè achebin.
Botyè è kurtiyâdzo krèchon alêgramin. Lè mônè achebin, kemin dè djuchto. D’ayeu, l’i a rin dè krouyè j’êrbè, l’an totè ôtyè dè bon. Ma, bin chure lè fô kan-mimo trére.

On bi matin, l’é apêchu ke prà dè pyantè l’iran gravalâyè dè pyà, nê è dèginyà. Kemin fére? L’é pâ l’akothema dè li betâ de la pojon, din mon kurti. Ma hou poutè bithè, fayê lè tséhyi. L’é moujâ ou venégro, ou chavon nê , a l’u bènête poutithre? On dzoua ou dou l’an pachâ. L’i moujâvo pâ-mé tan.

Chu anfin rè-jelâye vouityi. È bin, krêdè-mè, di pyà nê n’in d’avê gayâ rin-mé. Di galéjè bèthètè rodzè l’è j’avan avalâ, ouna redâye dè pevôlè, di Bithè a bon Diu… l’u bènête…